القصة كلها سندويشة لبنة

Labneh Sandwich

Enter a caption

Image from: http://reinventingnadine.blogspot.co.uk/2014/02/the-ultimate-labneh-sandwich.html

ما هيي كل القصة يا حبيبي متل سندويشة لبنة. بس مش بخبز عادي، لاء، بخبز مرقوق.

من كتر ما رأيني، إنخزأ. إنخزأ من نصو. نحنا النا تعودنا نرئ، بس طلعنا مش لاقطينا بعد. حاصلو! إنخزأ وإنخرأ، متل جدار الصوت. هيدا الحيط اللي منعتني اخرقو بس اختفيت، عرفتو؟  

بس هالخبزة شكلو ألبا كبير. حتى هيي ومخزوقة بتساع كتير. فيها بندورة بكاملها، جبلية من هول اللي بحبو الرواق. كبيرة وحمرا متل وجعي. بس بيناتنا، يمكن زدناها عليها شوي. كان لازم نجرب التومات سوريز. إنو معقول حتى البندورة تمنت لو كانت كرزة؟ بس اه معقول! قالتلك بركي بيغمق لوني شي شوي، بديل ما يكون أحمر متل الوجع، بصير أحمر متل العشق. عرفتها هيدي الحالة اللي عشناها بس ولا مرة حكينا فيها؟ اه هيدي!   

هلأ الخيارة ما في مهرب منا. صحيح بلا طعمة، بس بتجي package مع البندورة. متل أوجاع كتيرة بلا طعمه، بس أخ، بتوجع!  

أما البصلة فقصتها قصة. طول عمرن بقولو الحياة قشرة بصلة. بس ولا مرة فهمت شو قصدن. إنو إلها ريحة يعني؟ ولا ضعيفه ما بتلقى ضربة سكين؟ ولا بتحمي القلال اللي قررو يعيشو تحت سقفها؟ ما بعرف! بس شو بدنا بالقشرة هلق. خلينا بالبصلة. السندويشة بدا بصلة لتنزل الدمعة بلا إذن، وتكفت ع خدي كأنو الجفاف بعيوني جوعان. بقولو في موسم للجفاف. بس مش على علمي الموسم بيجي كل يوم!  

بس فيي فكر إنو هالدمع ضروري. إي ضروري ليسقي النعناع. ما النعنعة بدها قنطار مي لتنمى وإلا بتصير سودة متل ماضيك.

لأ ما خلصنا. بعد في الزيتون. شو بتمنى كون متلو! بعيش لوحدو، بلا مي بلا بلوط. بغازل الهواء بس بدو، بلا ما حدا يسمعو. متل قلبي بس يحكيك.

بس الفرق إنو إذا إنعصر الزيتون، بيتحرر الزيت وبيجي ممدد بقلب السندويشة متل شي نجمة وقعت وستلقاها الرمل. بس قلبي إذا إنعصر، أخ! يا دلي! بتتحرر إنت وبيغرق وجي أنا بالرمل وما بيعود فيي شوف النجوم.

عم تفهم عليي؟

ما هيي كل القصة يا حبيبي متل سندويشة لبنة. 

اللبنة ع فكرة، معروفة بفنها. فيك ترقصها متل ما بدك. بتروح وبتجي عالخبزة بخفة، وبتترك بصمات وراها بعد كل رقصة. بصماتها بيضة متل كل صفحة بطلب منك تكتبها… وبتبقى بيضة. 

قصتنا هيك يا حبيبي. بتروح وبتجي بخيالي وبترقص ذكرياتي.

ما كل القصة يا حبيبي متل سندويشة لبنة. أولك لح يجي يوم وتخلص هل السندويشة؟ 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s